Музей экспозициясында ән мен сұлулықтың тәжін қоса киген алаштың ақ маңдайлы аруы, қайталанбас дауыс иесі, Сыр елінің тумасы Роза Бағланованың сахналық киімі орналасқан. Бұл - киноархивтегі мәскеулік операторлар түсірген көріністерде жарқ етіп жүрген көйлектердің бірі. КСРО Халық әртісі, Халық Қаһарманы Роза Бағланованың сахналық киімі сол уақыттағы музей директорының орынбасары Көшекбаев Әмірғали мен музей қызметкері Аманкүл Нұржанова арқылы музей қорына 2002 жылы түскен. Көйлек 48-ші өлшемде, көк масаты мен шәйіден тігілген. Көйлекке қос етек түскен. Ал, масатыға алтын түстес дөңгелек әшекейлер жапсырылған. Ал, бөрігі терімен көмкеріліп, төбесіне үкі тағылған. Үкі - әсемдік берумен қатар, тіл-көзден сақтайды деген сенім болған.

Роза Бағланова қай елде болмасын, қай сахнада өнер көрсетпесін қазақтың әнін ғана емес, қазақтың ұлттық киімі мен салт-дәстүрін серік етіп, насихаттап жүрді. Ұлыбритания еліне сапарында Роза Бағланованың сахналық образына тәнті болған Елизавета патшайым: «Қазақ әйелдерінің киген киіміне қарап-ақ, олардың қандай халық болғанын тануға болады. Бұл киім байлық пен талғамды аңғартады», - деген екен. Роза Тәжібайқызының сахналық киімдерін Орталық Комитеттің тапсырмасымен арнаулы шеберлер дайындаған. Кімнің үлгісі мен түсі Роза Бағланованың жоғары талғамына қалдырылатын. Шет  елдерде қазақтың қос етек дүрия көйлегін, қынама бел қамзолын, үкісі бұлғаңдаған тақиясын киіп, жарқ етіп, сахнаға шыға келгенде жұрт  ду етіп қол шапалақтайтын. Бұл - өз ұлтының салт-дәстүрін қадірлей білген және өзгеге сыйлата алған ұлтжанды тұлғаның көрінісі.

Әйгерім БЕКҚҰЛЫ,

Қызылорда облыстық тарихи-өлкетану музейінің бөлім меңгерушісі