«Түркі академиясының жанынан музей ашылады. Музейдің жасақталуына жәрдем берген Алматыдағы Орталық музейдің директоры Нұрсан Әлімбай мен музей қызметкерлеріне, профессор Зейнолла Самашев және Астанадағы Ұлттық музей директорының орынбасары Олжас Шариздановқа алғыс айтамыз», - деп жазады Д.Қыдырәлі.

Айта өтейік, Қазақстан Республикасының Президенті Н.Назарбаев 2009 жылдың 3 қазанында Әзірбайжан Республикасының Нахчыван қаласында өткен Түркітілдес мемлекеттер басшыларының ІХ Саммитінде түркі өркениетінің жалпыадамзаттық өркениеттегі алатын орнын бағамдап, түркі әлемінің өткенін, бүгінін және болашағын зерттейтін халықаралық ғылыми орталық құру туралы ұсыныс жасады. Ұсыныс түркітілдес мемлекеттер тарапынан қолдау тауып, 2010 жылдың 25 мамырында Қазақстан Республикасының елордасы – Астана қаласында ғылыми орталық – Түркі академиясы құрылған болатын. Академия қазіргі уақытта 6 стратегиялық бағытта жұмыс жүргізуде. Бұйырса алдағы күндері академия жанынан Түркі музейі де бой көтермек.